Tum Saath Nahi Ho, Par Abhi Bhi Tum Hi Ho | Unsaid Story After Breakup

 

Tum Saath Nahi Ho, Par Abhi Bhi Tum Hi Ho

Maana ki ab humari baatein nahi hoti,
roz mulakaatein nahi hoti,
lekin main roz apne hi khayalon mein tumse baat karti hoon.
Aankhein band karke tumhe mehsoos karti hoon.
Bhale hi tum mujhse door ho,
lekin mere liye tum aaj bhi
sabse paas ho.

Dekho na,
tum bhi khud ko busy rakhte ho
taaki meri yaad tumhe disturb na kare.
Aur main bhi tanhaai se bhaagti hoon,
taaki mujhe tumhe sochne ka mauka na mile.

Zindagi ki is jung ko samajhna
bada mushkil hota hai,
jahan hum chah kar bhi
saath nahi reh pa rahe,
aur na hi kisi aur ka
haath thaamna chahte hain.

Kisi aur ke ho jaane ka khauf
abhi bhi dil ko sataata hai,
jaise maano dil aaj bhi
tum hi ko apne paas
rakhna chahta ho.

Har ek khayal se jude ho tum.
Kisi bhi cheez ko dekh kar
tumhara khayal aa jaana—
ke tum hote to tumhe batate.
Kisi jagah ko dekh kar
tumhari yaad aa jaana—
ke yahan hum kabhi
saath aaye the.

Tum har us jagah ho
jahan main bina soche
ruk jaati hoon.
Har us baat mein ho
jo main kisi aur se
share karte hue
aadhi chhod deti hoon.

Is feeling ko samajhna
bada hi mushkil hai,
kyunki rishta shuru bhi
hum dono ne milkar kiya tha,
aur shayad khatam bhi
humne hi kiya.

Shayad humari soch alag thi.
Lekin ab sochti hoon to lagta hai—
jahan different soch ke log milte hain,
wahan nok-jhok to hoti hi hai.

Dekha jaaye to
humari duniya bhi
kaafi alag thi.
Hum chahte to adjust
kar bhi sakte the,
shayad hum kar bhi lete,
par humari families,
humari society
shayad nahi kar paati.

Kyuki hum pyaar karte the,
isliye ek-dusre ko
samajh lete the.
Par poori duniya ko
samjha paana
humare bas ki baat
nahi thi.

Aur shayad hum darte bhi the—
kuch galat ho jaane se,
phir logon ko face karne se.
Kahin log ye na keh dein
“lo, yahi thi tumhari pasand.”
Kahin tum kuch galat na kar do,
kahin main tumhara
dil na dukha doon.

To shayad humne
theek ya galat ka
faisla nahi kiya,
bas wahi kiya
jo us waqt
mumkin laga.
Par dekho na—
alag hone ke baad bhi
hum poori tarah se
alag nahi ho paaye.

Shayad main bhi
tumhe yaad aati hongi.
Shayad tum bhi
din ke aakhir mein
mere baare mein
sochte honge.
Kisi humari ek baat ko
yaad karke
muskurate honge.

Ajeeb si kashmash hai ye—
hum door hokar bhi
door nahi ho sake.

Dono apni-apni
duniya mein mast hain,
lekin kahin na kahin
ek-dusre ki yaad
abhi bhi saath chalti hai.

Haan, shayad waqt lagega.
Phir hum theek ho jaayenge.
Tum bhi poori tarah
mujhe bhool jaoge,
aur main bhi
apni masroofiyat mein
kho jaungi.

Shayad phir
ek-dusre ka khayal
kam aayega.
Shayad yaadein
dheere-dheere
dhundli ho jaayengi.

Tumhari zindagi ke darwaze par
main khadi nahi hoti,
bas khidki se tumhe
ek jhalak dekh kar
wapas laut aati hoon.

Tumhari muskaan aaj bhi achi lagti hai,
bas itna farq hai ke
wajah main nahi hoon.

ke yeh baat janti hu magar btati nhi,
ke din kat rhe h aj bhi tere hi khayal me

lekin dekho na—
tum saath nahi ho,
par abhi bhi tum hi ho.......